Des Artichaultz. Chapitre .XII.

Ie delibere sommairement traicter des artichaultz pour ce que ie voy a present les jardins remplis d’yceulx, et yceulx estre reputez viande exquise. Ie voy certes non seullement les cuysines des princes estre de ce farciez, mais aussy des gens rusticques et vulgaires. Nous comme brutaulx devorons eschardons viandes naturelles des asnes, que nous ont faict ces bestes innocentes, indisciplinables, sans industrie, sans raison active, par quoy nous leur tollissons leur viande ? O nous par trop voluptueux, nous par trop subjectz a gulosite. O prodigues de ventre ce seroit merveille n’estre permys aux asnes manger artichault : les artichaultz sont ce que on appelle en latin carduus. Et est a noter ce mot carduus, non signifier eschardon, comme plusieurs pensent, mais estre, mais estre non attribuee a une espece de plante que nous appellons carduus en latin, en grec scolymos, ou cynara, quae dulcis Iaccho potanti veniat, nec phoebo grata canenti. Pour ce que est notoire estre grandissime controversie entre les autheurs tant grecz que latins des artichaultz, je parleray des especes.

Des especes des artichaultz. Chapitre .XIII.

Plusieurs ignorans herboristes pensent que chamelea soit artichault, certes ilz errent lourdement avecque leur Avicenne, lequel dict au quatriesme canon, que Chameleon et chameleae est tout ung qui est chose faulse, comme nous verrons. Car chamelea proprement est ce que les Arabes appellent Mezereon, et pour certain aultre chose est chameleon, et chamelea, chameleon est semblable a l’artichault, iacoit que ce ne soit tout ung, et y en a de deulx sortes ainsy que dict Dioscorides au .III. livre, le blanc et le noir. Chameleon proprement est une herbe que on appelle chardonnette ou contre rage en nostre pays et est appellee ceste herbe chamelea pour ce qu’elle mue et change selon la terre couleur, comme faict une beste de ce nom qui ce mue en quelque couleur qu’elle veult, par quoy nous appellons un homme variable et de malvaise foy ne tenant promesse, chameleon par sentence proverbiale1. Ceste herbe chameleon a la fueille comme l’artichault excepté qu’elle est aspre et plus poinctue, les fleurs de couleur pourpre, la racine sentant fort, blanche dedans. Le chamaeleon noir que nous appellons artichault noir, a les feuilles comme le vrai artichault excepte qui les a plus petites, et plus gresles et plus rouges : la racine grosse, noire, forte. Cestuy croist es lieux secz et arides, champestres et pres aulcunes foys des lieux marins. Au surplus que ce mot carduus signifie artichault, il appert, car Pline parlant des herbes domestiques au .XIX. livre, met l’artichault entre les arbres croissans es jardins. Or est il que les eschardons croissent communement es lieux agrestes, car on ne les souffreroit es jardins Il est notoire estre plusieurs eschardons lesquelz on leur nom propre comme erynge, centumcapita, tribulus, et plusieurs aultres. Erynge nous appellons chauces trappes pour ce que la teste de cestuy eschardon semble chauces trappes, les aultres disent que tribulation ce peuet appeller aussi chauce trappe. Pour revenir au propoz encommance Pline parlant des vertus medicinalles des herbes domestiques a mys l’artichault en ce nombre comme il appert au .XX. livre, cap. XXIII. Palladius aussy autheur singulier au quatriesme livre parlant des jardinages met, carduus, en ce nombre. Nous conclurons donc que carduus est artichault et parlerons de la maniere de cultiver yceulx artichaultz.

De cultiver les artichaultz.Chapitre .XIIII.

Les artichaultz se sement en deux sortes ainsy que recite Pline au .XIX. livre, en autumne par plante et par semence avant les nonez de mars.Il faut planter les planz avant les Ides de novembre2, il faut les fumer. Palladius au .IIII. livre dict que l’artichault doibt estre seme au moys de mars3. L’artichault demande terre grasse et menue, Pour avoir beaulx artichaultz les fault semer au croissant de la lune, et fault que avant soit la place pour les mettre disposee et appareillee, il fault qu’il y ait demy pied entre les grenes de distance. Il fault prandre garde quant on seme les artichaultz que la semence ne soit a l’envers : car ilz seroient durs et courbes. Les grenes ne doibvent point estre plus avant dedans terre que troys doys, puys couvre les de quelque chose legiere et quant ilz commenceront a lever sercles les souvant, si faict chaleur vehemente arrose les au soir et les couvre de quelque chose sur le hault du jour. Sy tu veulx avoir artichaultz qui n’aient point d’espine et qui ne pique point, prans la grene et rompz la sommite de ladicte grene et les semes. Sy tu veulx que ilz sentent l’eaue rose, prans la grene et fais tremper troys jours dedans ladicte eaue, puys fais secher et les semes. Quant tu verras que la teste de l’artichault commencera a meurir, et que elle se laschera, prans garde que il ne tombe de l’eau dessus, car la pluye nuyt a la grene. Sy tu veulx planter du plan d’yceulx, il faut que tu plante la racine au moys de octobre et fault que trampes ladicte racine en fumier et qu’il y ai troys piedz de distance entre le plan.

De la vertu medicinale des artichautz. Chapitre .XV4.

Devant que l’artichault porte fleur le just d’icelluy faict venir le poil sur la teste, et garde de tomber la racine cuyte et beue corrobore l’estomach ainsi que dict Pline au .XX. livre5. Icelle racine vault pour avoir enfans masle, et si vault a la matrice ainsi que recite Cherias auteur grec et Glaucias diligent scrutateur des artichaultz. Theophraste dit, la racine tant crue que cuyte estre bonne a manger, la racine cuyte en maniere d’ emplaistre mise soubz les aiscelles ouste la puanteur et odeur d’icelles, comme dit Dioscorides en son .III. livre, A celle mesme chose vault ladicte racine cuyte en vin et beue. La decoction pareillement a ce vault. Ladicte racine cuyte faict yssir l’urine puante, si elle est cuyte avecques vin. Galenus dict que elle tollist la maulvaise odeur des aiscelles et puanteur du corps. Les autres especes d’artichault qu’avons nommez chameleons, ou en vulgaire selon le mien jugement eschardonnette ou contre raige, ont vertu medicinale comme il appert par le recit de Dioscorides au .III. livre. La racine du chamaeleon blanc ou de l’eschardonnete cuyte faict mourir les vers du ventre si on la boit avecques vin et origan. Un drachme d’icelle avecques vin vault contre hydropisie, elle provoque l’urine et vault contre choses venimeuses. Icelle racine faict mourir les chiens, les ratz, les porceaux. Les aulcuns grecz appellent ceste herbe ixion ou ixia, pour ce que en plusieurs lieux icelle herbe porte guyst. Le just du chameleon noir vault pour la rongne des bestes. Icelle tue et faict mourir les mouches des chiens, la racine d’icelluy chameleon avecques souffre et alung cuyte ensemble vault contre la rongne. La decoction de la racine vault a douleur de dens.